ခိုးရာလိုက်ပြေးသည့် ၁၅ နှစ်အရွယ် အမျိုးသမီးငယ်တစ်ဦး မိမိကိုယ်ကို အဆုံးစီရင်မှုဖြစ်ပွား

ပြည်၊ မတ်လ (၇)ရက်။
သီဟလွင် (မြစ်မခ)
ခိုးရာလိုက်ပြေးသည့် ၁၅ နှစ်အရွယ် မိန်းကလေးငယ်တစ်ဦးသည် ပဲခူးတိုင်းဒေသကြီး(အနောက်ပိုင်း) ပြည်မြို့ရှိ တည်းခိုခန်းတစ်ခုတွင် တည်းခိုနေစဉ် ၎င်းအား ခိုးပြေးလာသူ ပြန်မလာသဖြင့် မိမိကိုယ်ကိုကိုယ် အဆုံးစီရင်ကာ သေဆုံးမှုဖြစ်ပွားခဲ့ကြောင်း သိရှိရသည်။


၎င်းအမျိုးသမီးမှာ ကိုကာကိုလာနှင့် ဓါတ်ဆီရောသောက်ခြင်း၊ လက်ကောက်ဝတ်အား ကိုလာသတ္တုဗူးခွံဖြင့် လှီးဖြတ် ဒဏ်ရာများဖြင့် မတ်လ ၆ ရက်နေ့ ညပိုင်းက သေဆုံးခဲ့ကြောင်း ပြည်ခရိုင်ရဲတပ်ဖွဲ့မှူးရုံးမှ သိရသည်။

အဆိုပါ မိန်းကလေးနှင့် အတူတည်းခိုသူ အမျိုးသားမှာ မတ်လ ၆ ရက်နေ့မနက် ၇ နာရီခန့်က ဘဏ် ငွေထုတ်ရန်ဟုဆိုကာ တည်းခိုခန်းမှ မှတ်ပုံတင်ထုတ်ယူပြီး ထွက်သွားခဲ့ကြောင်း နေ့လည် ၂ နာရီထိ တည်းခိုခန်းသို့ပြန်ရောက်လာခြင်း မရှိသောကြောင့် ထိုကဲ့သို့ သေကြောင်းကြံသည်ကို တည်းခိုခန်းမှ သိရှိရာ ရဲစခန်းသို့ အကြောင်းကြားခဲ့ခြင်းဖြစ်ကြောင်း သိရသည်။

“ကောင်မလေးက ၉ တန်းပဲရှိသေးတယ်။ ကောင်လေးကခိုးပြေးလာတော့ သူ့မိဘတွေက ၃၆၃ နဲ့ ထန်းတစ်ပင်ရဲစခန်းမှာ အမှုဖွင့်ထားတယ်။ အဲဒါကိုကောင်လေးကသိပြီး ရှောင်သွားတော့ ကောင်မလေးက သူ့ကိုယ်သူ သေကြောင်းကြံသွားတာ ကောင်မလေးက ဆေးရုံရောက်သည်ထိ အသက်မှီသေးတယ်။ ည ၁၂ နာရီကျော်မှာတော့ ကောင်မလေး အသက်သေဆုံးသွားတယ်။”ဟု ပြည်ခရိုင်ရဲ တပ်ဖွဲ့မှူးရုံးမှ တာဝန်ကျ ရဲအရာရှိက ပြောသည်။

သေဆုံးသူအမျိုးသမီးအား ဝေဖြိုးအောင်မှ ဖေဖော်ဝါရီလ ၂၆ ရက်တွင် မိဘများနေအိမ်မှ ခိုးယူခေါ်ဆောင်သွား သဖြင့် မိခင်ဖြစ်သူမှ မတ်လ ၂ ရက်နေ့တွင် ရန်ကုန်တိုင်းဒေသကြီး ထန်းတစ်ပင်မြို့နယ် တော်လတဲ့ နယ်မြေ ရဲစခန်းတွင် (ပ)၈/၂၀၁၇ ရာဇသတ်ကြီးပုဒ်မ ၃၆၃ အရ အမှုဖွင့်ဆောင်ရွက်ထားကြောင်း သိရသည်။

အဆိုပါ အမျိုးသမီးမှာ ပြည်မြို့အထွေထွေရောဂါကုဆေးရုံကြီးတွင် ဆေးကုသမှုခံယူနေစဉ်မှာပင် အသက်ဆုံးရှုံးခဲ့ရသောကြောင့် ပြည်မြို့မရဲစခန်းမှ သေမှုသေခင်းအမှတ် ၅/၂၀၁၇ ဖြင့် အမှုဖွင့်ကာ ဓမ္မတာအတိုင်းသေဆုံးခြင်း ဟုတ်၊ မဟုတ် စုံစမ်းစစ်ဆေးလျက်ရှိကြောင်း သိရသည်။
-